Харибо Нидерландаас нэг төрлийн чихрээ эргүүлэн татаж эхэлжээ. Учир нь цөөнгүй хүн, тэр дундаа нэг гэр бүлийн олон гишүүн 1 кг-ын савлагаатай Haribo Happy Cola F!ZZ-ээс идсэний дараа бие нь эвгүйрхсэн байна. Нидерландын хүнсний аюулгүй байдлын байгууллагын (NVWA) хэвлэлийн төлөөлөгчийн хэлснээр зарим хүмүүс энэ чихрийг идсэний дараа толгой нь эргэх шинж илэрчээ. Тус агентлагаас Голландын SBS6 телевизэд өгсөн тодруулгад “авсан дээжээс каннабис илэрсэн” гэж мэдэгджээ.
Харибогийн хэвлэлийн төлөөлөгч энэ талаар BBC-д өгсөн мэдээлэлдээ “бохирдлын талаарх баримтыг тогтоохын тулд цагдаа нартай хамтран ажиллаж байна” гэв.
NVWA гурван хайрцаг чихэр бохирдсон гэж мэдэгдсэн боловч Харибо урьдчилан сэргийлэх үүднээс нөөцөө бүхэлд нь эргүүлэн татаж байгаа юм байна.
Бүтээгдэхүүний хугацааны хувьд 2026 оны 1-р сард дуусахаар байгаа юм. Одоогоор хэдэн хүний бие муудсан нь тодорхойгүй байна.
NVWA каннабис хэрхэн чихэрт орсныг цагдаа нар шалгаж байгаа бөгөөд тухайн чихрийг идэхгүй байхыг нэмж зөвлөснийг Нидерландын хэвлэл мэдээллийн хэрэгслээр мэдэгдэв.
Бохирдсон бүтээгдэхүүн нь жинхэнэ Haribo юу, эсвэл хуурамч уу гэдэг нь тодорхойгүй байна.
Харибо хэрэглэгчдийнхээ аюулгүй байдлыг нэн тэргүүнд тавьж байгаа бөгөөд энэ үйл явдлыг “маш нухацтай” авч үзэж байгаагаа нэмж хэлэв. Чихрийн энэхүү том компани зөвхөн Нидерландад эргүүлэн татах арга хэмжээ авсан бөгөөд бусад бүс нутгуудад нөлөөлөөгүй гэж мэдэгдэв.
Бусад бүх бүтээгдэхүүнийг хэрэглэхэд аюулгүй гэж тус компани мэдэгдээд байна.
Эх сурвалж: bbc.com
