АТГ-аас асууя:
АТГ О.Тэмүүлэнгийн орлого үндэслэлтэй гэж үзлээ гэх хэвлэлийн мэдээндээ дараах хуулиудыг дурджээ.
Жирийн иргэн би бээр тэр хуулиудыг нь уншаад гарцаагүй л зөрчил байна гэж хараад болдоггүй ээ.
Сайн хуульч нар маань хариулаад өгөөч бас.
АВЛИГЫН ЭСРЭГ ХУУЛЬ
– 3.1.3.”албан тушаалын эрх мэдлээ урвуулан ашиглах” гэж албан тушаалын эрх мэдлийг албаны эрх ашгийн эсрэг буюу хувийн ашиг сонирхлоо гүйцэлдүүлэх зорилгод ашиглаж хийх ёстой үйлдлийг хийхгүй байх, хийх ёсгүй үйлдэл хийхийг;
Эрх мэдлээ урвуулан ашиглаж “Монголын шинэ эдийн засгийн форум” нэртэй ТББ-ыг байгуулж, Эдийн засаг хөгжлийн яам, Сангийн яамнаас нийт 2,6 тэрбум төгрөг авсан.
НИЙТИЙН АЛБАНД НИЙТИЙН БОЛОН ХУВИЙН АШИГ СОНИРХЛЫГ ЗОХИЦУУЛАХ, АШИГ СОНИРХЛЫН ЗӨРЧЛӨӨС УРЬДЧИЛАН СЭРГИЙЛЭХ ТУХАЙ
– 3.1.2.”хувийн ашиг сонирхол” гэж нийтийн албан тушаалтан албаны бүрэн эрхээ хэрэгжүүлэхэд өөрөө болон түүнтэй хамаарал бүхий этгээдийн зүгээс нөлөөлж болохуйц эдийн болон эдийн бус ашиг сонирхлыг;
Албаны бүрэн эрхээ хэрэгжүүлэхэд өөрөө болон түүнтэй хамаарал бүхий этгээдийн зүгээс нөлөөлж болохуйц эдийн засгийн ашиг олсон – Монголын шинэ эдийн засгийн форум ТББ-ын дансыг шалгаж, “Херо ентертаймент групп” мөнгө орсон эсэхийг шалгасан уу?
– 3.1.5.”хамаарал бүхий этгээд” гэж тухайн нийтийн албан тушаалтны эцэг, эх, төрсөн ах, эгч, дүү, гэр бүлийн гишүүн, хамтран амьдрагч, эхнэр /нөхөр/-ийн эцэг, эх, төрсөн ах, эгч, дүү, бусад нэгдмэл сонирхолтой этгээдийг;
Хүү нь гэр бүлийн гишүүн нь биш юм уу? Зөвхөн хүүгийн орлогыг шалгаад өг гээгүй шүү. Хүүгийнх нь данс руу ямар утгатай ямар шилжүүлэг орж ирснийг нь хармаар байна. Херо группээс нь юм уу? Баатарын хувийн данснаас юм уу? Хувийн данснаас бол үндэслэлтэй орлого биш. Ямар гэрээний үндсэн дээр мөнгө орж ирсэн юм бол?
– 3.1.11.”ашиг сонирхлын зөрчилтэй гэж ойлгогдохуйц нөхцөл байдал” гэж тухайн нийтийн албан тушаалтан өөрийн нэг ангид сурч байсан болон сурч байгаа этгээд, мөн гишүүнчлэлд нь хамаардаг холбоо, сан, хамтын шийдвэр гаргадаг байгууллага, тэдгээрийн гишүүд, нэг нутгийн хүн гэх зэрэг олон нийтийн зүгээс ашиг сонирхлын зөрчилтэй гэж ойлгохуйц этгээдтэй холбоотой асуудлаар үйл ажиллагаа явуулахыг.
Нэг ангийн хүүхэд, нэг нутгийн хүн биш хэдий ч УИХ-ын гишүүн, Сангийн сайд Б.Жавхлантайгаа нийлээд УИХ-ын гишүүн, Ерөнхий сайд хүн нийлээд ТББ байгуулаад улсын төсвөөс мөнгө аваад ажил гүйцэтгэж болдог юм уу? Энэ ашиг сонирхлын зөрчил биш юм бол өөр юу ашиг сонирхлын зөрчил юм бэ?
Гэр бүлийнх нь орлого 15 сая гэж Хөрөнгө орлогын мэдүүлэг дээрээ мэдүүлсэн байхад хүүгийнх нь зарсан мөнгө түүнээс хэд дахин өндөр байхад Ерөнхий сайдад хамааралгүй гэж үзэж болох уу?
Т.Амарзаяа
