Өчигдөр MongolZ маань ялагдашгүй Vitality-г хоёр дахиа өмнөө сөгдүүллээ. Өчигдөр бас ялагдашгүй бүхнээ ялан дийлсэн домогт Kobe–гийн төрсөн өдөр байлаа.
Өнөөдөр MongolZ нэгэн чухал цом өргөхөөр тоглох өдөр.
Өнөөдөр бас Mamba Day өдөр л дөө.
Ийм л маш нарийн уялдаа, бэлэгдэл бүхий үгийг Senzu хэлснийг хэн ч, бүр ямар ч спортын тайлбарлагч, сонирхогч, хэвлэл мэдээлэл тайлбарласангүй.
Vitality-г дарааллан буулгаж авсан нь дандаа нэг статистик биш ээ. Энэ бол утга санааны өөрчлөлт. Дэлхийд ноёлж буй багийг Монголын хүүхдүүд сөхрүүлж, их финалд гарч ирснийг HLTV хүртэл улирлын хамгийн том сенсаци гээд онцолсон байна.
Senzu фенүүдээ “MVP!” гэж давалгаалуулан уухайлуулсан тэр мөч Коби Брайнтын (Black Mamba) төрсөн өдөртэй давхцсан.
Харин өнөөдөр (8/24) Лейкерсийн 8, 24 дугаарыг илтгэсэн Mamba Day буюу дэлхий даяараа Кобиг дурсан тэмдэглэдэг өдөр билээ.
Mamba Mentality гэдэг нь юу гэсэн үг вэ?
Коби өөрөө Mamba Mentality–г “Өдөр бүр өчигдрөөсөө дээр байхыг хичээ. Өөрийн хамгийн сайн хувилбараа бүтээ.” гэж тодорхойлсон. Энэ бол зүгээр нэг уриа биш. Энэ бол тууштай хөдөлмөр, чанартай бэлтгэл, хамтуу сахилга бат, тогтмол дахин дахин давтах тухай зарчим. Азад найдах бус, судал, давт, бэлтгэ. Шийдвэрлэх мөчид өөртөө итгээд сурсан бүхнээ гарга гэсэн үг юм.
Коби энэ утга санааг амьдралынхаа турш янз бүрийн хэлбэрээр байнга давтан хэлдэг байлаа.
Энэ философи спортын төрөл үл харгалзан ижилхэн үйлчилнэ.
Товчхондоо бол:
1. Спортод хэн нэгнээс айх бус харин эрх зориг чухал.
2. Өрсөлдөгчийн нэр хүндэд бус өөрийн даалгавартаа л анхаар.
3. Бэлтгэл, сахилга бат, байнгын давтамж. Энэ гурав бол харилцан шүтэлцээтэй процесс юм.
Шийдвэрлэх мөчид гарах төвлөрөл нь олон мянган удаагийн давталтын эцэст гарах ганцхан мөч юм.
Тэгвэл MongolZ яагаад Mamba-тай уялдана вэ?
Vitality бол дийлдэхгүй баг гэж олон хүн боддог. Тэд бол дээд зиндааны стандарт. Харин MongolZ хоёр том тэмцээнд дарааллан тэднийг ялж финалд хүрсэн нь “чадвар + сахилга + зориг” гурвыг нэг шугамд давхцуулж чадсаны нотолгоо. Энэ бол яг Mamba Mentality–гийн алдар хүндээс нь айхгүй, зөвхөн процессдоо итгэж, яг шийдвэрлэх мөчид ажлаа тултал гүйцэтгэх зарчим юм.
Senzu фенүүдээ “MVP” гэж хашгируулахдаа ялалтыг “Mamba”–д (Кобид) зориулсан өнгө аястай болгосон нь гурван түвшний бэлгэдэлтэй гэж би харж байгаа:
1. Цаг хугацааны давхцал — 8/23: Кобигийн төрсөн өдөр, 8/24: Mamba Day. Яг энэ завсарт Монголын баг дэлхийн аваргыг сөхрүүлэв.
2. “Сүрдмээр алдар хүндийг нь биш, өөрийн хийх ажлаа л хүндэл” гэсэн Кобигийн сагсан бөмбөгийн талбайн зарчим CS2-ийн Maps дээр бодитоор буусан.
3. Соёлын харилцан ойлголцол буюу Монголын ялалтыг дэлхийд танил домгийн хэлээр (Mamba) өөрийгөө тайлбарлав. Ингэснээр энэ ялалт дотоодын бахархлаас давж, дэлхийн спортын нэгдсэн яриа хэлэлцүүлэгт орлоо.
Mamba Mentality–г Коби өөрийнхөө үгээр “Өчигдрөөсөө илүү өөрийгөө бүтээх тасралтгүй эрэл хайгуул хийх…” гэж 2020 оны 8-р сарын 24-нд EtonLine.com сайтад өгсөн төрсөн өдрийнхөө ярилцлагын үеэр хэлсэн байдаг.
(“Kobe Bryant Day: What ‘Mamba Mentality’ Meant in His Own Words” гээд хайхаар энэ видео гараад ирнэ шүү.)
Эцэст нь Кобигийн нэгэнтээ “Мөрөөдөл бол хайрын хэлбэр. Хайртай зүйлдээ шилдэг нь болох гэж зүтгэ” гэж хэлсэн гоё үг байдгийг хэдүүлээ саная.
Энэ багийн, энэ хүүхдүүдийн туулж ирсэн замнал, амжилтын нууц хийгээд цаашдын замналыг унших “нууц код” нь ийнхүү тодорхой боллоо. Энэ бол Mamba Mentality.
Үүнийг хэзээ нэгэн цагт тэдний хэн нэг нь зарлах нь байсан. Одоо тэр цаг нь нэгэнт иржээ. Өөрөөр хэлбэл Senzu энэ үгийг сэтгэл хөдлөлөөрөө шууд хэлээгүй ээ. Өмнө нь сайтар бодож боловсруулаад яг шийдвэрлэх мөч буюу өчигдөр-өнөөдрийг хамруулсан гүн утга гэж логикоор харагдаад болдоггүй ээ. Тийм болохоор л би үүнийг бичлээ.
Дахин хэлье. Өнөөдөр дэлхий даяараа, гэхдээ үүний утга учрыг мэддэг хүмүүс Mamba Mentality-г тэмдэглэж байна.
Ц.Чимэддондог
