“Мах үнэтэй гэвэл тахианы махны сонголт бий….” гэсэн постууд Элч.мн сайтын эх сурвалжаас цахим орчинд хэвлэлүүд нийтэлж, иргэдийн маш их шүүмжлэлтэй тулаад буй.
Тэгвэл Шадар сайд Т.Доржханд хэлсэн үгийг нь мушгисан хэмээн дараах тайлбарыг өөрийн цахим хуудаснаа бичжээ. Гэвч түүний энэхүү тайлбар нь шүүмжлэл дагуулсан постуудын үгийг нэг мөр баталж өгөв. Тэрээр:
“Иргэддээ хямд цахилгаан нийлүүлнэ гээд төр үнийг хатуу барьж, эрчим хүчний салбараа татаж унагасан нь бидний алдаа. Үр дүнд нь ашиггүй гээд хувийн сектор хөрөнгө оруулдаггүй, банк төслийг нь санхүүжүүлдэггүй, улсаараа цахилгааны хязгаарлалттай, хоёр хөршөөс цахилгааны 25 хувийг авч байна.
Саяхан хямд гурил иднэ гээд газар тариалан, гурилын үйлдвэрлэлийн салбараа унагах шахсан.
Өнөөдөр хямд мах иднэ гээд махны экспортоо зогсоож, үнийг хүчээр барих нь буруу.
Харин нөөцийн махыг хүртээмжтэй түгээх, орлох бүтээгдэхүүний хэрэглээг дэмжих нь зөв бодлого.
Жич: Юу ч ярьсан бичлэг тасдуулж, мушгиулдаг болсон тул тайлбар хийхээ больсон” гэв.
Түүний энэ тайлбар өмнөх үгийг нь мушгисан гэж залруулах бус харин хатуу үгсийг нь баталсан байр суурийг илэрхийлжээ.
