Сүхбаатар аймгийн Эрдэнэцагаан суманд өчигдөр /2026.05.13/ гарсан хоёр хээрийн гал түймрийг унтраахаар Онцгой байдлын байгууллага, Хилийн цэрэг, сумын мэргэжлийн нийт 143 хүн, 24 автомашинтайгаар ажиллаж байна.
Үүнд:
-Сүхбаатар аймгийн Эрдэнэцагаан сумын Алтан-Овоо багийн хогийн цэгээс 10:40 цагт гарсан хээрийн түймэр,
-Сүхбаатар аймгийн Эрдэнэцагаан сумын “Бадрах” III багийн “Бор-Өндөр” гэдэг газар 20:30 цагт бүртгэгдсэн хээрийн түймрийг унтраах ажиллагааг тус тус зохион байгуулж байна.
Цаг үеийн нөхцөл байдал
Газар дээрээс нь сурвалжилсан мэдээллээр:
-Сүхбаатар аймгийн Эрдэнэцагаан сумын хогноос алдсан түймэр баруун урд талаараа Бичигт боомт руу , зүүн урд хэсэгтээ Дорнод Монголын дархан цаазат газар луу тун дөхсөн байдлаар маш өргөн тархжээ. Дорнод аймгийн онцгой байдлын газрын долоон бүлэг хоёр талдаа хуваагдан нутгийн гүн рүү оруулахгүйн тулд ажилласаар байна /2026.05.14 03:40 цаг/. Салхи 15-18м секунд хурдтай байв.
-Уртаашаа 80 гаруй, өргөн нь 40 орчим км тархсан энэ түймэрт азаар айл, мал өртөөгүй. 2 айлын өвөлжөө шатсан байна /2026.05.14 06:20 цаг/. Түймэр тархсанаас хойш шөнөжин ажилласаар зүүн талаасаа 16 орчим км үлджээ. Баруун үзүүрээ бариад авчихсан гэж мэдээлж байна. Дорнод аймгаас 7, Сүхбаатар аймгаас 4 мэргэжлийн ангийн бүлгүүд, Булган сумаас 5 хүн түймрийг унтраахаар ажиллаж байна. Булган сумын 1-р багийн дарга н.Түвшинтөрөөр ахлуулсан 5 хүний бүрэлдэхүүнтэй бүлэг Матад сумын түймэрт ажиллаж байна.
Тэд цурам ч амсхийлгүй түймрийн аюулыг дарахаар тэмцэж байна.
