Хөвсгөл аймгийн Алаг-Эрдэнэ сумын “Бух Царам” орчимд “Өтгөн Тайга” ХХК-иас “Тайга фестиваль” зохион байгуулахаар төлөвлөж буй. Тэгвэл тус арга хэмжээтэй холбогдуулан аймгийн холбогдох мэргэжлийн байгууллагуудаас тухайн арга хэмжээний үеэр үүсэж болзошгүй эрсдэлийн нөхцөл байдалд үнэлгээ хийж, зохион байгуулагч талд албан бичиг хүргүүлээд байгаа юм байна.
Тус арга хэмжээг алслагдсан, ойн бүсэд зохион байгуулах нь гэмт хэрэг, зөрчил, зам тээврийн осол нэмэгдэх, согтууруулах ундааны хэрэглээтэй холбоотой эрсдэл үүсэх, оролцогчид төөрөх, мөн ой, хээрийн түймэр гарах зэрэг нөхцөл байдлыг бий болгож болзошгүй гэж албаныхан үзсэн. Иймд иргэд, оролцогчдын аюулгүй байдлыг хангах, нийтийн хэв журам, замын хөдөлгөөний аюулгүй байдлыг хамгаалах, болзошгүй эрсдэлээс урьдчилан сэргийлэх зорилгоор тус фестивалийг хөдөө орон нутагт бус аймгийн төв Мөрөн хотод зохион байгуулах нь зүйтэй гэж мэдэгдэж байна.
Мөн дээрх асуудалтай холбоотойгоор “Өтгөн Тайга” ХХК-ийн төлөөлөлтэй 2026 оны 6 дугаар сарын 12-ны өдөр уулзалт зохион байгуулж, эрсдэл үүсэж болзошгүй нөхцөл байдал, шаардлагатай урьдчилан сэргийлэх арга хэмжээний талаар танилцуулан, мэргэжлийн байгууллагуудаас холбогдох шийдвэрийг албан бичгээр хүргүүлжээ.
Иргэд, ААН-ээс аливаа олон нийтийг хамарсан арга хэмжээг зохион байгуулахдаа Монгол Улсын хууль тогтоомж, холбогдох дүрэм, журам, аюулгүй ажиллагааны шаардлага болон мэргэжлийн байгууллагуудаас өгсөн зөвлөмжийг хэрэгжүүлж ажиллахыг мэдэгдлийн үеэр хүслээ. Түүнчлэн тус фестивалийн зохион байгуулалтад хамтран ажиллах боломжгүй гэдгээ мэдэгдлээ.
Мэдэгдлийн дэлгэрэнгүйг ЭНД ДАРж үзнэ үү.
