УИХ-ын чуулганы өчигдөр /2025.10.16/-ийн хуралдаан өнөөдөр 10:13 цагт 66 гишүүн буюу 52.4 хувийн ирцтэйгээр эхэллээ. Хуралдааны эхэнд УИХ-ын дэд дарга Х.Булгантуяа чуулганы ирцтэй холбоотой асуудлаар УИХ-ын Ерөнхий нарийн бичгийн дарга Б.Баасандоржоос тодрууллаа. Учир нь зарим гишүүд чуулганы ирцийг өнөөдөр дахин бүртгэх ёстой гэсэн байр суурьтай байгаагаа илэрхийлжээ. Тэгвэл УИХ-ын чуулганы хуралдааны дэгийн тухай хуулийн 6 дугаар зүйлд “Хуралдааны тов, дараалал тогтооход баримтлах журам”-ыг тусгасан бөгөөд 6.2-т Нэгдсэн хуралдаан 7 хоног бүрийн пүрэв, баасан гарагт хуралдана, 10:00 цагт хуралдаан эхэлнэ гэж заасан байдаг. Ингэхдээ гишүүд 09:00 цагаас ирцэд бүртгүүлж, хуралдаанаар асуудал хэлэлцэхэд бэлтгэнэ гэж заасан. Үүний дагуу 2025 оны аравдугаар сарын 16-ны чуулганы хуралдаанд бэлтгэх ирцэд бүртгүүлэх хугацаа нь 09:00 цаг бөгөөд энэ ирцийн бүртгэл нь 2025 оны аравдугаар сарын 17-ны өдрийн 10:13 цагт бүрдсэн байна. Үүнд чуулганы дэгийн тухай хуультай зөрчилдсөн зүйл байхгүй гэдгийг УИХ-ын Ерөнхий нарийн бичгийн дарга Б.Баасандорж тайлбарлалаа.
Ийнхүү Монгол Улсын Ерөнхий сайд Г.Занданшатарыг огцруулах эсэх, УИХ-ын дарга Д.Амарбаясгаланг өөрийн хүсэлтээр чөлөөлөх эсэх асуудлыг хэлэлцэх УИХ-ын чуулганы хуралдаан эхэллээ.
