УИХ-ын чуулганы 16, 17-ны өдөр дамжсан хуралдааны эхэнд Монгол Улсын Ерөнхий сайд Г.Занданшатарыг огцруулах эсэх асуудлыг хэлэлцэн шийдвэрлэлээ. Тогтоолын төслийг Төрийн байгуулалтын байнгын хорооны санал, дүгнэлтийг УИХ-ын гишүүн А.Ариунзаяа чуулганы хуралдаанд танилцуулав.
Улмаар 44 гишүүн асуулт асууж, үг хэлэх байсан ч хуулийн хугацаа 13 цагт дуусгавар болох учиртай тул 12:30 цагт санал хураалт явуулахаар товлосон. Ингээд ТББХ-ны санал, дүгнэлтийн томъёоллоор санал хураалт явуулахад УИХ-ын 111 гишүүдийн олонх буюу 71 гишүүн буюу 64 хувь нь татгалзсан санал өглөө. Өөрөөр хэлбэл, Ерөнхий сайд Г.Занданшатарыг огцруулахыг олонхоор дэмжлээ гэж УИХ-ын дэд дарга Х.Булгантуяа танилцуулж, эцсийн найруулгыг сонсгосонд тооцлоо. Гэхдээ энэ санал хураалт, ер нь Ерөнхий сайдыг огцруулах санал өргөн баригдсан цагаасаа эхлэн Үндсэн хуулийн зөрчилтэй явж ирлээ гэж сайд С.Бямбацогт, Ж.Энхбаяр нар үзэж байна. Тиймээс Ерөнхий сайд Г.Занданшатарыг огцруулах чуулганы хуралдаан ТББХ-ноос оруулж ирсэн томъёоллоор асуудлыг хэлэлцэх нь Үндсэн хуулийн зөрчил дагуулж байна хэмээн үзэж Цэцэд маргаан үүсгэсэн тул эцэстээ хүчингүй болох магадлалтай юм байна. Эсвэл Ерөнхийлөгч хориг тавьж болох юм.
Санал хураалтаас өмнө Ерөнхий сайд Г.Занданшатар 15 минут үг хэлсэн. Тэрээр хэлсэн үгэндээ өнгөрсөн 4 сарын хугацаанд хийж гүйцэтгэсэн ажил болон улс төрийн нөхцөл байдлыг дүгнэж, байр сууриа илэрхийллээ. Түүнийг 67.8 хувийн саналаар Ерөнхий сайдаар томилж байв.
