Түлш хэрэглэгчдэд үйлчлэх төвөөс зуух нь битүүмжээ алдаж, угаартах эрсдэл өндөр болсон зорилтот бүлгийн айлуудад шинэ зуух суурилуулж байгаа юм байна.
Тухайлбал СХД-ийн 8 дугаар хороонд олон хүүхэдтэй, хөгжлийн бэрхшээлтэй, өндөр настай, өрх толгойлсон зорилтот бүлгийн айл өрх олон байдаг бөгөөд хуучин зуухнууд нь ан цав гарч, битүүмжээ алдан угаартах өндөр эрсдэлтэй болсон тул нийслэлээс зуух шинэчлэх ажлыг үе шаттай хийж байгаа аж. Өнөөдрийн байдлаар 425 түлшний цэг ажиллаж, 410 цэг түлшний илүүдэлтэй хонож байна. Иргэдийн санал гомдлын дагуу түлшний цэгүүдийн тоог нэмсэн гэх мэдээллийг албаныхан өгч байгаа юм.
Ингээд өдөр бүр айлуудад тандалт хийж, стандартын шаардлага хангахгүй зуухыг, мөн айл өрхүүдийн хүсэлтийн дагуу зуухыг нь сольж өгч байгаа аж. Тухайн шинэ зуух нь бүтэн шаталттай, утаа бага гаргадаг, MNS 5216 стандарт бүхий гурван шатлалтай, утаа шүүгчтэй, түлш түлэхэд 8–10 цаг дулаанаа барьдаг гэх нүүдэлчин зуух гэлээ.
