Сүүлийн өдрүүдэд Google Forms ашиглан фишинг халдлага хийх оролдлого нэмэгдэж байгааг холбогдох албаныхан анхааруулж байна.
“Meta for Business” нэртэй хуурамч мэйлээр “Фейсбүүкийн албан ёсны цэнхэр тэмдэг авсан тул баталгаажуулна уу” гэсэн агуулгатай, Google Forms-ийн холбоос хавсаргасан фишинг мэйл илгээж байна.
Тус халдлага нь Facebook хуудас хөгжүүлэгч, админ эрхтэй хэрэглэгчдийг онилж, Google Forms-ийг ашигласнаар жинхэнэ мэт харагдах давуу талтай байна.
Фишинг халдлагад өртсөн тохиолдолд өөрийн хувийн мэдээлэл, имэйл, нууц үгийг алдах эрсдэлтэй бөгөөд нууц үг оруулах хэсэгт ямар ч утга оруулсан “нууц үг буруу байна” гэсэн алдаа гарч, бодит нууц үгээ алдах эрсдэл үүсгэдэг.
Урьдчилан сэргийлэх зөвлөмж:
Сэжигтэй мэйл, холбоос дээр дарж хувийн мэдээлэл оруулахгүй байх.
Хэрэв санамсаргүй дарсан бол нууц үгээ даруй солиорой.
Албан ёсны баталгаажуулалт зөвхөн Facebook-ийн өөрийн платформоор дамждаг.
Энэхүү сэрэмжлүүлгийг бусдад түгээж, ойр дотынхоо хэрэглэгчдэд анхааруулаарай.
