УИХ-ын Ёс зүйн дэд хороо М.Нарантуяа-Нара гишүүнтэй холбоотой гомдлуудыг маргааш хэлэлцэхээр болсон байна. Тэрээр өнөөдөр өөрийн нэр дээр нь ирсэн гомдолтой танилцжээ. Түүнд холбогдуулан нийт 48 өргөдөл, гомдол ирсэн аж. Тодруулбал, Засгийн газрын Иргэд, олон нийттэй харилцах төвд 10, Өргөдлийн байнгын хороонд утсаар 2, цахимаар 34, бичгээр 2 гомдол ирсэн байна. Мөн үүний 31.3 хувь нь олон нийтийн сүлжээгээр бусдыг гүтгэн доромжилж нэр төр, алдар хүндийг үл хүндэтгэсэн, 20.8 хувь нь төрийн албаны нэр хүндийг гутаасан, 16.7 хувь нь өсвөр үе, залуучуудад сөрөг үлгэр дуурайлал үзүүлсэн, 12.5 хувь нь гишүүний нэр хүнд, эрх мэдэл, албан тушаалын байдлаа урвуулан ашиглан бизнесийн байгууллагын бараа бүтээгдэхүүн сурталчилсан талаар байсан ба нийт өргөдөл гомдлын 62.5 хувь нь Ёс зүйн дэд хороогоор хэлэлцүүлж, сахилгын хариуцлага ногдуулах, 34.4 хувь нь УИХ-ын гишүүнээс эгүүлэн татахыг хүссэн байна.
Харин М.Нарантуяа-Нара гишүүн өргөдөл, гомдолтой танилцсаны дараа хэлсэн сэтгэгдэлдээ “Дөрөвхөн жил суугаад буух ажилд би яахаараа өөрийгөө бүрэн өөрчлөх ёстой вэ? УИХ гэдэг чинь хүний зан байдал, характерыг засан хүмүүжүүлдэг газар биш биз дээ? Одоохондоо миний хийж чадах ажил бол энд болж байгаа юмыг дамжуулах. Үүнийгээ хийсээр л явж байна. Би төрийн ордноос иргэдийг мунхаг мулгаа гэж лайв хийгээгүй. Гэртээ болсон үйлдэл дээрээ би яагаад УИХ-ын Ёс зүйн хороогоор орох ёстой вэ гэдэг асуудал маш хөгжилтэй байна. Гэтэл төрийн ордонд зодолдож байгаа хүмүүс дээр нэг ч ёс зүйн хариуцлага тооц гэсэн хүсэлт ирдэггүй. Хуульчид олон талаас нь тайлбарлах биз ээ” гэв.
