УИХ-ын Хууль зүйн байнгын хороо өнөөдөр таван асуудал хэлэлцэхээр товлосны эхэнд Эрүүгийн хуульд нэмэлт, өөрчлөлт оруулах тухай хуулийн төсөл байв. Хуралдааны эхэнд хэлэлцэх асуудлыг танилцуулсны дараа УИХ-ын гишүүн Х.Тэмүүжин тус хуулийн төслийг ирэх долоо хоног хүртэл хойшлуулах санал гаргалаа. Тэрээр “Өчигдөр ажлын хэсэг шийдвэрээ гаргаж цаасаа эцэслэсэн. Гэхдээ уг өөрчлөлттэй холбоотойгоор эрх ашиг нь хөндөгдөж байгаа хамгийн том бүлэг болох МСНЭ тодорхой байр суурийг илэрхийлээд байгаа. Ажлын хэсгээс эцэслэсэн цаастай холбоотой асуудлаар салбар дотроо судлах, саналаа илэрхийлэх, хэлэлцүүлэг өрнүүлэх хэрэгтэй байна гэсэн юм. Тухайн салбарын төлөөлөл ажлын хэсэгт байгаа боловч ардаа байгаа мэргэжилтнүүд, сэтгүүлчидтэйгээ хуулийн төслийг хэлэлцүүлэхгүйгээр асуудлыг ярих боломжгүй учраас хугацаа өгөхийг хүссэн. Тийм учраас энэ удаагийн хэлэлцэх асуудлаас хасаад, ирэх долоо хоногт шилжүүлээд, сэтгүүлчиддээ байр сууриа нэгтгэх, хэлэлцэх долоо хоногийн хугацаа өгье гэсэн горимын санал гаргаж байна” гэлээ.
Эрүүгийн хуулийн 13.14-т байсан “Худал мэдээлэл тараах” заалтыг Үндсэн хуулийн цэц Үндсэн хууль зөрчсөн гэж үзсэнийг УИХ хүлээж авсан боловч Засгийн газраас ажлын хэсэг байгуулж “Гүтгэх” гэсэн нэр дор дахин Эрүүгийн хуульд хэвлэн нийтлэх эрхэнд халтай заалт оруулж ирэх гэж байгааг хэвлэл мэдээллийн салбарынхан эрс эсэргүүцэж байгаа юм. Ажлын хэсгийнхнээс боловсруулан оруулж ирж буй хуулийн төсөл нь анх Эрүүгийн хуулийн 111.1, 111.2 байсан заалтуудыг эргэж амилуулах гэж байна гэх шүүмжлэлтэй мөн тулж байна.
Ямартай ч өнөөдрийн Хууль зүйн байнгын хороогоор Эрүүгийн хуульд нэмэлт, өөрчлөлт оруулах тухай хуулийн төслийг хэлэлцэх асуудлаас ирэх долоо хоног хүртэл хойшлуулахаар боллоо. Мөн хуралдаан даргалагч Д.Цогтбаатар Дэд хороо байгуулах асуудлыг хойшлуулах санал гаргаж, улмаар өнөөдрийн хуралдаанаар гурван асуудал хэлэлцэх санал хураалт явуулахад 16 гишүүний 56.3 хувь нь дэмжсэнээр дээрх Эрүүгийн хуулийн төсөл, болон Дэд хороо байгуулах гэсэн хоёр асуудлыг хойшлуулахаар тогтлоо.
