Хөвсгөл аймгийн Алаг-Эрдэнэ сумын ЗДТГ, “Жинст Мөрөн” ХХК хамтран 2014 оноос санаачлан зохион байгуулж ирсэн “Сарлаг наадам” хүрээгээ тэлсээр холын гийчдийн хоймор нутгийг зорин ирж үздэг Хөвсгөл аймгийн томоохон баяр наадмын нэг болоод байгаа юм.
Сарлаг үхрийн үнэ цэнийг таниулах, ашиг шимийг нэмэгдүүлэх, байгаль орчинд ээлтэй уламжлалт мал ахуй, нүүдэлчин өв соёлоо хадгалан хамгаалж, уур амьсгалын өөрчлөлтийг сааруулахад хувь нэмрээ оруулахыг уриалах, зочид, жуулчдад орон нутгийн бүтээгдэхүүнээ сурталчлан таниулах зорилгоор тус аймаг “Сарлаг наадам”-ыг 6 дахь жилдээ зохион байгуулах гэж байна. “Хоймор нутаг-Сарлаг наадам 2025” долдугаар сарын 20-ны өдөр эрдэм шинжилгээний хурлаар эхэлж, 21-ний өдөр Алаг-Эрдэнэ сумын Даланбулагт үндсэн үйл ажиллагаагаар өрнөнө.
Наадмыг санаачлагчид танилцуулахдаа “Бэлчээрийн доройтол, дэлхийн дулааралд анхаарлаа хандуулж байгаа энэ цаг үед бид хариуцлагаа ухамсарлаж дэлхийн дулаарлын эсрэг өөрсдийн хувь нэмрийг оруулж, малын чанар, сүргийн бүтцэд анхааран хөх сарлагийн тоо толгойг нэмэгдүүлж, эрүүл мал, бэлчээрийн зохистой хэрэглээг сайжруулахад анхаарч байна. Энэ ч зорилгоор сарлагийн түүхий эдээр химийн хольцгүй бүтээгдэхүүн үйлдвэрлэх чиглэлээр ОУ-ын болоод шинжлэх ухааны байгууллага, малчид, хоршоод, үндэсний үйлдвэрүүдтэй хамтран ажиллаж байна. Цэнхэр дэлхий, Хөвсгөл далай, хөвч их уулс, хөх сарлагаа бэлгэдэн энэ жилийн наадмаа хөвсгөлчүүд “Хоймор нутаг-Сарлаг наадам 2025” гэж нэрлэн наадмын өнгөө хөх өнгөөр илэрхийллээ” гэлээ.
Хөвсгөл аймаг хамгийн олон сарлагтай таван аймгийн нэг бөгөөд 22 сумын малчид 174 800 гаруй толгой сарлаг маллаж байна. Наадмыг зохион байгуулагч Алаг-Эрдэнэ сумын малчид нийт орлогынхоо 30 гаруй хувийг сарлаг малаасаа авдаг байна. Улсын хэмжээгээр 2024 онд 13 аймгийн 132 суманд нийт 999 400 гаруй толгой сарлаг тоологджээ.
“Сарлагийн наадам 2025”-аар
Тохоштой ганган сарлаг үзүүлбэр
-Сарлагтай сайхан хос шалгаруулалт
-Сарлаг бугуйлдах тэмцээн
-Сарлаг үхрийн уралдаан
-Сарлаг булгиулах тэмцээн
-Сарлагийн сүүтэй үнээний тэмцээн
-Сарлагийн шилмэл бухын тэмцээн
-Үндэсний бөхийн барилдаан,
-Үндэсний сур харваа
-Сарлагийн хөөвөр, ноолууран бүтээгдэхүүн, жижиг дунд үйлдвэрлэл эрхлэгчдийн үзэсгэлэн худалдаа гэх мэт үйл ажиллагаанууд зохион байгуулагдана.
