Насанд хүрээгүй байж болзошгүй хүүхдүүд эмэгтэй хүүхдийг зодож, тохуурхаж байгаа бичлэг цахим орчинд цацагдаад байгаа юм.
Энэ талаар албаныхнаас тодруулахад “Тухайн асуудлыг гомдол, мэдээлэлд бүртгэн шуурхай шалгах ажиллагаа явуулахад Баянзүрх дүүргийн Ерөнхий боловсролын …-р сургуулийн 11 дүгээр ангийн сурагчид тус сургуулийн эмэгтэй сурагчийн биед халдаж, зодон бичлэг хийсэн болохыг илрүүлж, шалгалтын ажиллагааг үргэлжлүүлэн явуулж байна” гэлээ. Албан бус мэдээллээр охиныг ухаангүй болтол зодож, хүчирхийлэл үйлдсэн байж болзошгүй гэх нөхцөл байдал яригдаж байгаа аж.
Уг үйл явдал энэ сарын 06-нд болсон бөгөөд цагдаагийн байгууллагад мэдээлэл ирээгүй, цагдаа бичлэг хөөж илрүүлэн 8 хүүхдийг холбогдуулан шалгаж байгаа юм байна.
Үе тэнгийн дээрэлхэлттэй холбоотой бичлэгүүд цахим орчинд цөөнгүй нийтлэгдсээр байна. Цагдаагийн байгууллагаас тухай бүр шуурхай шалгаж тогтоон, арга хэмжээ авч байгаа, урьдчилан сэргийлэх чиглэлээр тасралтгүй аян арга хэмжээ, нөлөөллийн ажлууд хэрэгжүүлж, ЕБС, төрийн болон хувийн хэвшлийн байгууллагуудтай хамтран ажиллаж байгаа хэдий ч үүнд эцэг эхчүүдийн хараа хяналт маш чухал гэдгийг мөн сануулж байна.
